يوميات مهاجر بزز عليه

كتب في 30 مارس 2021 - 6:55 م
مشاركة

بقلم: عبد الرحيم الجبلي
اليوم الموالي، فاقو الرباعة اللي اسكنت معاهم بكري طيبو اتاي شربوه وانا ناعس احداهم خلاو الكيسان والبراد فارغين؛ تقريبا السادسة والنصف شي يلبس في احوايج الخدمة شي شاعل الكارو شي داخل الطواليت ،المهم القردة ابدات كاطلع في الراس .
ماكلمتش شي واحد لاني ضيف ومخلص افلوسي ولكن هم اقدام اعليا مكاين شي واحد عندو شي ورقة المهم امشاو للخدمة مع السباكيتي ،في الصباح صبحت جيعان امشيت كانقلب لكاين شي حاجة وانطلع شي براد والو لا سكر لا اتاي لاهم يحزنون اعلاش؟ لان الدار فيها جوج مجموعات كل مجموعة كاطيب بوحدها المهم ماعلينا فيقت ولد خويا امشينا افطرنا على برا سدينا الباب مني ابغينا نرجعو صبناه مسدود ولد الاخ اطلع من النافدة وحل لي الباب اش انديرو والو شعلت التلفزة مبغاتش تشعل وانا نخبطها من الفوق عاد تشعل، المهم مكايرجعو حتى المساء دوزنا النهار بالقهر جاو شي كايدوش شي كايعجن شي طلع اتاي عيطو ليا الله اكثر خيرهم كنت نصحاب باش نشرب امعاهم ولكن باش انخلص حقي في الصيارة اديال الاسبوع، المهم اعطيتهم نصيبي ونصيب ابن الاخ عاد اتتفسو وعطاوني كاس اديال اتاي اشربتو مافيه حتى مداق بلا نعناع بلا والو .
اسمعتهم كايدويو مع بعضياتهم اعلى النوبة اديال العجينة والطياب دخلت راسي وقلت ليهم انا انديرها غدا ، فقط يرضيو اعليا ،المهم اليوم الموالي نفس الشئ ،في الصباح لا احترام لا والو امشاو كيف العادة للخدمة طيبت اتاي طيبنا للغدا العشاء ،ولد الاخ اعجن وانا طيبت الطاجين ياسلام اول مرة غادي نتعشاو المهم ابقينا على هاذ الحال حوالي ثلاث اسابيع لا خدمة لا ردمة كلشي كايتسناك ويستغلك باش تبقى اطيب ليهم وماتمشيش تخدم، هاذي نصيحة من ولد الاخ اديالي بالحرف قال مادام كايصيبوك عاجن ومطيب لعشا اكيد غادي يبغيوها .ابديت كانعيق والفلوس الي عندي قربت اتسالي في احد الليالي مع الرابعة والنصف صباحا دخلو اصحاب الحال جمعونا كلنا اداونا لواحد الفيلاج اسمه الباريدو، ماشي غا احنا حتى صبت ليك حوالي 50 خمسين شخص أكثرهم من لوناسدة كلهم كايعرفوني ،والمصيبة عندي الفيزا باقة مسالاتش وامشيت معاهم لان الباسبور كنت مخبيه في جهة اخرى ولكن كنت داير البال الى كان شي رجوع للمغرب كنت غادي انقولها ليهم ، بصمونا وصورنا، في العشية تم اطلاق سراحنا مع الاحتفاظ بي 15 تم ارجاعهم للمغرب لانهم فايتين مشدودين وعاطين اسماء مزورة ، كاين اللي ارجع مع اصحابو كاين اللي عندو العائلة، انا ولد خويا ارجعنا مشيا على الاقدام حوالي 19كلم .
نفس الروتين نفس العملية مكاينش اللي يقولك يالله تخدم، ازعفت اطلع ليا الدم وانا انعيط لواحد ولد عمي كاين في نابولي افرح مسكين مني قلت ليه انا عبد الرحيم قال لي غدا اتقطع وادجي عندي ،انعادمت الثقة اخبرته مسبقا الى كنت غادي نوصل عندك واتسد التليفون قولها ليا من اهنا ، هداك الشي اللي ما يكونش المهم وليت كانفكر في الذهاب لنابولي ولا نبقى مع هاذ الناس فاخترت الذهاب للنابولي .
يتبع