يوميات مهاجر بزز عليه

كتب في 28 مارس 2021 - 9:04 م
مشاركة

بقلم:عبد الرحيم الجبلي 
خليناها اسيدي مني سد اعليا التليفون(الخال) ؛ قلت مع راسي ربما الوقت متأخر واليوم الموالي الاثنين كاينة الخدمة، يعني باقي عندي امل لكن ابن الاخ عارف كل شي ؛ فيا الجوع وضرني البرد رغم اننا في شهر ماي الجو باقي بارد، صيفط ولد الاخ جاب لينا واحد جوج اديال الشوارمة انسخنو حلاقمنا بعدا ومدبرها حكيم شدينا الميترو باش نمشيو للمحطة اديال التران ابغيت انقطع الورقة اديال الميترو مبغاش ولد الاخ قال واش انت مدوخ كاين شي اجنبي كايخلص واخة هكاك خلصت الورقة اديالي هو لا وصلنا للمحطة اديال التران كاين البوليس ولد الاخ ماعندوش لوراق واخة هكاك مخايفش، انا عندي الفيزا ماشي مشكل المهم اخدينا ورقة وحدة ليا انا من ميلانو لفيرونا هو مبغاش دائما نفس التبرير ، وصلنا معطلين لفيرونا انعسنا في المحطة حتى للصباح وفي الصباح شدينا الحافلة لواحد الفيلاج اسمه كلونيا فينيتا وصلنا مع شي السابعة عاودنا الاتصال يتعذر الاتصال به ، المهم امشنيا لواحد لبار شدينا قهيوات وبريوش كنت في المغرب كناخذ بيصارة ولمسمن مع الصباح اهنا كاين البريوش، المهم افطرنا وابقينا في واحد الجردة حتى يصبح الحال اشوية ،وهما يدوزو من احدانا الجدارمية عرفونا اجداد مدواوش امعانا والحق يقال حوالي الثامنة والنصف قلت لود الاخ يالله نمشيو عند ؟؟؟؟؟ قال يالله وغادي اتشوف كلشي الراسك امشينا مصبناهش صبنا غا الوالدة اديالو شافتني وعنقاتنا فطرتنا بالزايد اجلسنا معاها شي ساعتين قالت لينا سيرو للدار الاخرى سكنو مع الدراري، ابعيدة شي خمسة كلم اضربناها اعلى رجلينا وصلنا ماصبنا حتى شي واحد كلشي خدام كايرجعو في العشية ابقينا نتسناو حدا  الباب حتى رجعو، كايشوفو فينا شي شوفة ابحال باغي انخونو، سولونا مالكم ياك لباس قلنا ليهم ابغينا انسكنو اهنا وراه مول الدار قالها لينا مبغاوش حتى جا وكانعرفهم من عندنا من لوناسدة معقلوش اعليك، المهم جا مول الدار قال ليهم راهم غادي يسكنو اهنا كلشي ولا معبس، هو يجرني للتيساع قال ليا ارى 150 اورو اديال لكرا انت ولد خوك قلت اياه ماشي مشكل اعطيتو لفلوس ادخلنا للدار كنت نسحابها دار والله حتى داخت بيا الارض خربة امسمينها دار السقف من العود وبيت الما ادخل ليه تصاب بالغثيان قلت مع راسي انسى اعليك المغرب وعيش حياة اجديدة هاذ الشي اللي درت ؛ مول الدار قال ليا واش تمشيو تعشاو معايا ولا مرة اخرى قلت ليه مرة اخرى ها اولاد ابلادي نتعشاو امعاهم هههههه السبكيتي ياحبيبي هو العشا والنعاس معنديش شي مانطة لا والو اعطاوني واحد الكاشة راشية حتى ولد خويا هكاك وانعسنا غوق الديفانوات اصبح الحال عنقي اصبح اعوج …..ومن هنا ابغات تبدا القصة مع اولاد لبلاد كيف كانو يستغلوك باش ماتخدمش المهم …يتبع