يوميات مهاجر بزز عليه

كتب في 26 مارس 2021 - 6:28 م
مشاركة

نهاية 1997 كانت تاريخا مفصليا بين الجامعة وتحولا جدريا في حياتي .
ايوا فاين خليناها ، باقي عاقل مني حكيتها واسكت ارجعت للحرم الجامعي على اساس باش اندير الرسالة في قانون الاعمال او علم الاجرام ،اخترت الدكتور عبدالسلام بنحدو ،فعلا رحب بي مع ان الدكتور محمد النخلي والكشبور كانا قد ابديا رغبتهم،ا المهم سي عبد السلام استقبلني قال كلمة واحدة غادي تبحث في “المسؤولية الجنائية لشركة المساهمة ” وزاد واصدمني ولا مرجع واحد كاين فقط احكام قضائية فرنسية لازم تمشي لفرنسا .
رجعت للقلعة تفكير زائد تفكير، داخت بيا الارض يعني خاصاك مصاريف باش تمشي وباش نستقر وباش تبحث وكل مرة هاانت جاي وهاانت غادي، مساهلاش مدام مكاينش منحة اديال البحث قلت مع راسي يمكن نشتعل في التجارة بحكم ان اخواني كايمارسوها ،استقريت مع الاخ الاكبر بالقلعة بالحي الصناعي وفعلا وليت خدام امعاه جبت ليهم كليان من فرنسا حتى ولاو كايديو التصدير وانا اللي كنت مشرف على الانتاج ،ابقينا غادين هكاك حتى يفرجها ربي اشوية ولينا كانديرو المعلبات اديال مربى المشمش والزيتون، ابديت فعلا نحقق ارباحا مزيانة بحكم اني كنت انا الي كانبيع ليه كانمشي مرة في الاسبوع كاندير القلعة ورزازات مكونة تينغير تنجداد كلميمة الراشيدية الريصاني كانخوي الكاميو وكانرجع، الفلوس احبوب مكاينش الشاكات .
الاسبوع الماجي كاندير القلعة بني ملال قصبة تادلة زاوية الشيخ اخنيفرة لقباب زايدة ميدلت الريش الراشيدية، المهم كل مرة والرزق اديالها لمدة اربع سنوات وانا على هاد الحال نصيبي فقط بقشيش وليس اجر اعرف هذا ….
مليت حاولت انبدل اشريت فورد ترونزيت بقرض من البنك وليت كانخدم الراسي كانت المدة اقصيرة بحكم الطريق خاصك ادور مع اصحاب الحال وانا مكانبغيش .
مرة مرة وكانمشي عند خوتي لفقيه بنصالح وكانبقى معاهم مكايخصروش ليا ،ولكن انا نفسي ضيقة اشوية كانمل ههههه، جميع العمال اللي كانو عند الاخ كايحتارموني زيدون دريع العياشي كانعرفهم كبير وصغير .ارجعت عند الاخ لكبير اقترح اعليا الزواج وبمن !!!! انها ابنة شريكه وراه موافق المهم اتوكلت على الله الخير مني يبغي يجي الاخ اديالي اقترح اعليا الهجرة وفعلا مليقتش مشكل في الفيزا اديال فرنسا اخديتها ابغيت نمشي لكن باقي شي حاجة خاصني انديرها .
درت العقد اديال الزواج واليوم الموالي عندي الحافلة لايطاليا .
يتبع….