المغرب خرج ليهااااا كوووود

كتب في 13 ديسمبر 2020 - 9:09 م
مشاركة

 بقلم عزيز ادامين
أشنو هي تامغريبيتي
نرجع ناقش موضوع الاخير ديال الاعتراف الامريكي بالصحراء المغربية، وكيفاش أن أمريكا كأقوى دولية عظمى تصطف في الجانب المغربي…
..
كيعجبني نرجع شوية للتاريخ، لانو من خلالو كنقدرو نفهمو أشياء كثيرة، أما لي باقي متأثر الشعارات “مع” أو “ضد”، فأنصحه من البداية، بلا يمكل يقرا التدوينة، لانها موجهة للكثلة الكبيرة من المغاربة لي متبعة الوضع من موقع تامغريبيت ديالها
….
علاقة المغرب باسرائيل:
في سنة 1993، وقع محمود عباس باعتباره ممثل السلطة الفلسطينية مع اسرائيل اتفاقية السلام، ولي سميت اتفاقية أوسلو.
لي الفلسطينين يعترفون باسرائيل، ويسعون للسلام معها كدولة
في مقابل اسرائيل تعترف بمنظمة التحرير الفسلطينية وتسعى للسلام معها..
علاش اسمها اتفاقية بأوسلو؟
معروف أن أي اتفاقية تتاخذ اسم المدينة التي وقعت فيها، إلا هاذ الاتفاقية.
فاتفاقية السلام، أو اتفاقية ترتيبات الحكم الذاتي الانتقالي ، وهو الاسم الحقيق ديالها، توقعات بين منظمة التحرير الفلسطينية واسرائيل، توقعات في واشنطن، تحت رعاية بيل كليتون، وسميت بأوسلو، نسبة إلى المدينة النرويجية لي تمت فيها المفاوضات السرية بين قيادات الفلسطينية والقيادات الاسرائلية من 1991 إلى 1993.
المغرب، بشكل خفي، كان جزء من هاذ المفاوضات، كيفاش وعلاش ووقتاش وغيرها من الاسئلة، ما شي وقتها الان، ولكن ممكن ترجع تشوف لقاء ديال 1986 بين الحسن الثاني وشمعون بيريز ، أو ما يسمى لقاء افران، وتفهم أشياء كثيرة.
المهم، بعد الاتفاق بين السلطة الفلسطينية واسرائيل، المغرب انشأ مكتب اتصال (استوعب خويا المغربي، مكتب اتصال وليس سفارة ) واحد في الرباط والثاني في اسرائيل، وبالتالي العلاقة المغربية الاسرائيلية كانت بشكل رسمي وعليني بعد موافقة الاشقاء الفلسطينين…

وللاشارة بزااااااااااف الصحفييين لي كنعرفهم الان، كأسماء “لامعة” خدمات في مكتب الاتصال الاسرائيلي في الرباط، وماشي شغلي فيهم ، حريتهم هاديك، غير ما ينكرو ما يتنكرو ….

المغرب في 23 أكتوبر 2000، غادي يصدر بلاغ عن الخارجية المغربية عقب الانتفاضة الفلسطينية الثانية، وغادي يسد مكتب الاتصال، لكون اسرائل أخلت بالتزاماتها بالسلام وأنها تمارس انتهاكات حقوق الانسان ضد الفلسطينين….
بالمناسبة، كنتمنى سيد ناصر بوريطة يضبط التواريخ، لانه في لقاءه في فرنس 24 ، خربق شوية التواريخ ….

و من 2000 إلى غاية 2020، استمرت العلاقات المغربية الاسرائيلية، ولكن بشكل غير معلن عنه، وفي قطاعات استراتيجية، مثلا لي رجع وشوف الصحافة والتحقيقات الدولية في أوائل 2020، أن المغرب اشترى من اسرئيل طائرات بدون طيار، وأن المغرب، وبلا ما نهضرو على مجال الزراعة لي الدار البيضاء والغرب لي استفدوا من الشركات الاسرائيلية من 2003 إلى غاية اليوم، في مجال تخصيب النباتات والتقنيات الزراعية، وناهيك على القطااااع السياحي، شوف احصائيات هيئة السكان والهجرة الإسرائيلية لي كتنشر سنويا تقاريرها ، راه ما بين 80 ألف و100 ألف اسرائليلي كيزروز المغرب سنويا …
أه بالمناسبة، ملي كنقولو السياح الاسرائيلين، يعني لي دخلو بجواز سفر اسرائلي، ولكني واش عارفين أن من مليون يهودي مغربي في اسرائيل، شحال من واحد عندو جواز سفر مغربي؟ راه 350 ألف يهودي مغربي عندهم جواز سفر مغربي، بمعنى كيدخلو للمغرب كمغاربة ولا يحسبون في أعداد الاسرائيلين….

أه، هاذ 350 ألف يهودي مغربي في اسرائيل مغربية الجنسية، راها صوتات على الدستوري المغربي ديال 2011، بمعنى جزء من المشروعية ديال الحكومة الحالية ، راه من مشروعية اليهود المغاربة…

نرجعو، للعلاقات أيضا، واش عارف أنه اسرائيل، أكثر من مرة سلمات جثامين مغاربة للمغرب كانوا يقاومون في صفوف فلسطين ضدها…. ما صدقتينيش، وكتصدق حزب الله ، وحماس … راني كنعطيك معلومات من بلاغات صادرة عن هذه الهيئات …
باركة هادشي الان .

أشنو علاقة أمريكا بالصحراء؟
هاد الايام، كثرات التحليلات بزاااف بخصوص موضوع الاعتراف الامريكي بمغربية الصحراء ، ولي ضرني هو محللين ربطو القرار الكبير لي توقع (كاين لي ردو مجرد اعلان رئاسي فقط ههههه)، من قبل ترامب ، كاين لي ربطو مصيره ببايدن، وكاين لي برطوا بالغونكرس …
أي واحد يربطو كفما بغا، واخا يربطو مع شجرة..
ولكني …
بغيت فقط، نطرح سؤال، واش هادشي جديد؟ أو بالاحرى أشنو المستجد؟
خويا المغربي، و اختي المغربيةـ، بمعنى تامغريبيت، بصراحة هادشي ما شي جديد هادشي…
رجع لجميع التمويلات في إطار التعاون الدولي لي كتقدم أمريكا للدول، حيث كل مرة كيصادق الغونكرس الامريكي على هاذ الميزانية، يصادق أيضا على التمويل للمغرب بما فيها المناطق الجنوبية…
وكيسميها في التمويل ديالو وفي وثائقه الرسمية بالاقاليم الجنوبية المغربية…
باش نوضح أكثر، الاتحاد الاوروبي، فاشك يبغي يمول المغرب في شي لعبة ، كيقول ليه هاك التمويل، ولكن لن يشمل الصحراء…
مثلا في مجال حقوق الانسان، الاتحاد الاوربي هو لي مول وخلص ما سمي بجبر الضرر الجماعي في إطار هيئة الانصاف والمصالحة، لي هي بالمناسبة 13 منطقة كانت فيها معتقلات سرية أو أنها مناطق كانت مغضوب عليها وتعرضات لانتقال من الحسن الثاني، وهاذ 13 منطقة المشمولة بجبر الضرر، من بينها كانت منطقة العيون، ولكني الاتحاد الاوروبي، رفض يمول مشاريع في الصحراء المتنازع عليها، لهذا المغرب اضطر أنه يبدل العيون بطانطان….

عطيت فقط هاذ المثال، باش نبين، أن أمريكا كانت كتمول المشاريع عبر الغونكرس كل التراب المغربي بما فيه العيون والداخلية….

إذن، الناس لي كيخمخموا في الغونكرس من الان، كنطلبهم يرجعو يقراو تصريحات سواء السيناتورات من الحزب الديمقراطي أو الجمهوري أثناء المناقشة على هاذ الميزانيات…

واش إذن هادشي ديال اعلان ترامب عادي؟ كنقول لا، بالعكس كبير وكبييييييير بزااااف
المستجد، هو القنصلية بالداخلة (استوعبها مزيان أخويا المغربي ، عااااافك استوعبها ) ، ثانيا الاعتراف العلني ليس بدعم الحكم الذاتي كحل وحيد وأوحد، وأنما الاعتراف بمغربية الصحراء (عاود استوعب هاذ الامر) ، ثالثا هي ضخ 3 ملايير الدولارات في المنطقة ….
عافاكم، أمريكا، ماشي جمعية ديال الاحسان باش تصدق علينا، وأنها دير هادشي كامل والمغرب ما عندو ما يعطيها….
ملي ترجع للتقارير الاستراتيجية، والتحاليل الامريكية، خلال الاسابيع الاخيرة، كتقول أن المغرب، من بين الدول القليلة جدا التي يعول عليها اقتصاديا ما بعد كورونا… وهي من الدول الامنة حاليا من اجل الاستثمار الاقتصادي….
هاذ الهضرة ماشي ساهلة ….
….
المغرب، بكل صدق رغم موقفي منه بخصوص سياساته الداخلية، من الاعتقالات والانتقامات، والريع والفساد لي كينخرو …. كنحس به دولة عريقة في السياسة الخارجية …
….
لهذا كنقول باش نلخص كولشي:
اعلان علاقة المغرب باسرائيل أو علاقة المغرب بأمريكا: هو فقط ما كان غير معلن أصبح معلنا 
ولكن النقط والاهداف المسجلة لصالح الوحدة الترابية….
مغربي وأفتخر.